दैनिक आनंद News (प्रतिनिधी)
सुसंस्कृत संगमनेर ड्रग्स च्या विळख्यात
गेल्याकाही दिवसांत संगमनेरात अमली पदार्थांच्या तस्करीचे एकमागून एक प्रकार समोर येत असताना त्यात आता केवळ चर्चेत असलेल्या मात्र कारवाईपासून अद्यापही दूर असलेल्या 'एमडी' या अतिशय घातक नशेली पदार्थाची तस्करीही समोर आली आहे. उपविभागीय पोलीस अधिकाऱ्यांना मिळालेल्या गोपनीय माहितीच्या आधारावर आज पहाटे शहर पोलिसांच्या संयुक्त पथकांनी नाशिक रस्त्यावरील गजबजलेल्या मानवी वस्तीच्या परिसरात सदरची कारवाई करीत एका आलिशान वाहनासह तब्बल 43 लाख 90 हजार रुपयांचा मुद्देमाल हस्तगत केला आहे. या प्रकरणी एकाला ताब्यात घेण्यात आले असून त्याच्या चौकशीतून अनेक धक्कादायक खुलासे होण्याचीही शक्यता आहे. या कारवाईने संगमनेर शहरातील तरुणाई अतिशय घातक नशेच्या आहारी जात असल्याने शहराची अवस्था 'उडता संगमनेर'च्या दिशेने सुरु झाल्याचे चित्र दाखवलेयाबाबत उपविभागीय पोलीस अधिकाऱ्यांच्या कार्यालयाकडून समजलेल्या माहितीनुसार सदरची कारवाई आज (ता.21) पहाटे तीनच्या सुमारास पुणे-नाशिक महामार्गावरील गणेशनगर परिसरात करण्यात आली. पोलीस उपअधिक्षक कुणाल सोनवणे यांना याबाबत गोपनीय माहिती प्राप्त झाली होती. त्यानुसार त्यांनी शहर पोलीस ठाण्याचे निरीक्षक समीर बारवकर, उपनिरीक्षक श्रीकांत सावंत यांच्यासह संयुक्त पथक तयार करुन संशयीत ठिकाणी सापळा लावला.आज (ता. 21) पहाटे तीनच्या सुमारास संशयीत असलेले वाहन पुण्याच्या दिशेने आले व नाशिक रस्त्यावरील परिवार शॉपीच्या पाठीमागील बाजूला गेले. पोलिसांना मिळालेल्या माहितीनुसार सदरचे वाहन एमडी तस्करीसाठीच आल्याची खातरजमा होताच पोलिसांनी अगदी एखाद्या सिनेमाला शोभावे अशा पद्धतीने चारही बाजूने 'त्या' वाहनाची नाकाबंदी करीत संबंधित तस्कराच्या हालचालींवर लक्ष केंद्रीत केले. मात्र संबंधित तस्कराकडून वाहनात बसूनच इतरांशी फोनद्वारा संपर्क सुरु झाल्याने अखेर पोलिसांनी एकमेकांना इशारा करीत एकाचवेळी 'त्या' वाहनावर धावा केला.यावेळी वाहनात टोयाटो फॉर्च्यूनर (क्र.एम.एच.15/एफ.एफ.9630) बसलेल्या इसमाला त्याची ओळख विचारली असता त्याने स्वतःचे नाव आशिष सुनीलदत्त मेहेर (वय 20, रा. पुष्पवृष्टी बंगला, शिवाजीनगर, सातपूर, नाशिक) असल्याचे सांगितले. त्याला तरुणाला ताब्यात घेत त्याच्यासह वाहनाची झडती घेतली असता त्यात जवळ बाळगण्यासही मनाई असलेल्या व अतिशय घातक समजल्या जाणाऱ्या एमडी या अमली पदार्थाचा साठा सापडला. या कारवाईत पोलिसांनी वाहनासह सदरचा अमलीपदार्थ ताब्यात घेतला असून शहर पोलीस ठाण्यात गुन्हा दाखल करण्याची प्रक्रिया सुरु आहे. या कारवाईने शहराला अमली पदार्थांचा विळखा पडत असून शहराची वाटचाल उडता संगमनेरच्या दिशेने तर होत नाही ना? अशा शंकाही आता उपस्थित होत आहे.
